Abaraperi bari aba cyera! Bruce Melodie ku ndirimbo The Ben yamwibasiyemo
Bruce Melodie yagaragaje ko yumvise ubutumwa yagenewe na The Ben binyuze mu ndirimbo nshya yashyize hanze yitwa ‘Indabo zanjye’, icyakora ahita amunnyega amwibutsa ko abaraperi bari aba cyera.
The Ben na Bruce Melodie bari kuryoshya imyidagaduro bikomeye binyuze mu buryo bari guterana amagambo mbere y’igitaramo kizabahuza tariki 1 Mutarama 2026, nyuma yo gukorerana indirimbo intambara yabo ishobora kuba igiye kwimukira ku mbuga nkoranyambaga.
Asa n’uwereka The Ben ko yamaze kumva indirimbo ‘Indabo zanjye’, Bruce Melodie yabanje guserereza The Ben ati “Mbega inzuki” aha usesenguye imvugo ushobora gukeka yamubwiraga ko yumvise ari nk’inzuki ziduhira.
Nkaho bidahagije, Bruce Melodie yongeyeho ati “Abaraperi bari aba cyera!” imvugo ugenekereje wakumva ko ari iyo kunnyega uburyo The Ben yaririmbye mu ndirimbo ‘Indabo zanjye’.
Abinyujije mu ndirimbo ye nshya yise ‘Indabo zanjye’ The Ben yasubije Bruce Melodie wari umaze iminsi amushotoye mu yo yari aherutse gusohora yise ‘Munyakazi’ ndetse twanagarutseho mu nkuru zacu zabanje.
Aba bahanzi bakomeje gucyocyorana mu gihe bategerejwe mu gitaramo kizabahuriza ku rubyiniro rwa BK Arena tariki 1 Mutarama 2026.
