Inyungu ya I&M Bank Rwanda yazamutseho 46% igera kuri miliyari 17,8 Frw
I&M Bank (Rwanda) Plc yatangaje ko inyungu yayo y’igihembwe cyarangiye ku wa 30 Nzeri 2025, yageze kuri miliyari 17,8 Frw, bisobanuye izamuka rya 46% ugereranyije n’igihembwe nk’icyo mu mwaka ushize.
Ibi ni ibyatangajwe mu itangazo iyi banki yashyize ahagaragara, ryerekana ko umutungo wayo warenze agaciro ka miliyari 1000 Frw, bisobanuye izamuka rya 30% kuva umwaka watangira.
Iryo zamuka iyi banki ivuga ko irikesha imikorere ihamye, ishyirwa mu bikorwa rya gahunda zayo z’igihe kirekire n’umuhate wo gukorera abakiliya mu buryo buboneye.
Imibare yatangajwe n’iyi banki yagaragaje ko muri rusange amafaranga yinjije avuye mu bikorwa byayo bisanzwe (net operating income) yiyongereyeho 29% agera kuri miliyari 54,1 Frw.
Ni mu gihe inyungu zivuye ku nguzanyo zazamutseho 36% zikagera kuri miliyari 48,5 Frw, bishingiye ku izamuka rya 35% ry’inguzanyo zatanzwe, zikaba zarageze kuri miliyari 479,4 Frw.
Amafaranga abakiliya babikije muri iyi banki yazamutseho 33% agera kuri miliyari 875 Frw, ibigaragaza ukwiyongera kw’icyizere n’imikoranire ya banki n’abakiliya bayo mu nzego zose.
Agaciro k’ibyakozwe kazamutseho 16%, bitewe ahanini no kongerera ubushobozi abakozi, kwita ku ikoranabuhanga no kwagura amashami hirya no hino mu gihugu. Impuzandengo y’inyungu ku musaruro (cost-to-income ratio) yageze kuri 45,7%, bigaragaza gutera imbere mu mikorere.
Umuyobozi Mukuru wa I&M Bank (Rwanda) Plc, Benjamin Mutimura, yavuze ko umusaruro mwiza iyi banki yagize muri iki gihembwe wavuye ku miyoborere ifite icyerekezo no ku bufatanye n’abafatanyabikorwa.
Ati “Nishimiye gutangaza ikindi gihembwe cy’iterambere rihamye mu gihe tugana mu mpera z’umwaka wa 2025. Uyu musaruro ugaragaza icyizere cy’abakiliya bacu, umurava w’abakozi bacu ndetse n’ igenamigambi ryiza.”
Yongeyeho ati “Ishoramari dukomeje gukora mu kubaka ikoranabuhanga rigezweho no kurushaho gushyira abakiliya ku isonga, ritanga umusaruro ugaragara mu byiciro byose.”
“Ndishimira uruhare dukomeje kugira mu buzima bw’Abanyarwanda, twagura uburyo babona serivisi z’imari, ndetse n’uruhare mu iterambere ry’igihugu muri rusange.”
Urutonde rw’ikinyamakuru Global Banking & Finance Review, rwagaragaje iyi I&M Bank Rwanda nka banki ya mbere mu gihugu mu gufasha ibigo bito n’ibiciriritse ndetse na banki yihariye mu gutanga serivisi nziza ku bakiliya bato mu mwaka wa 2025.
I&M Bank (Rwanda) Plc ikomeje gutanga umusanzu no mu mibereho myiza, aho yahaye abarenga 3.000 amahugurwa y’ubumenyi mu bijyanye n’imari.
Umuyobozi Mukuru wa I&M Bank (Rwanda) Plc, Benjamin Mutimura, yavuze ko umusaruro mwiza iyi banki yagize muri iki gihembwe wavuye ku miyoborere ifite icyerekezo
