Mu 2025 yakiriye abakiliya ibihumbi 13: Grand Legacy Hotel yashimiye uruhare rw’abakiliya mu iterambere ryaryo
Grand Legacy Hotel yifatanyije n’abagayina mu birori ngarukamwaka bibinjiza mu minsi mikuru ya Noheri n’Ubunani bizwi nka ‘Christmas Tree Lighting’, bashimirwa imikoranire myiza bagirana, ibizeza gukomeza kubaha serivisi ibanogeye.
Ni ibirori byabaye ku wa 12 Ukuboza 2025, bibera aho Grand Legacy Hotel ikorera i Remera, bikaba byitabiriwe n’abayobozi mu nzego zitandukanye, abakora muri iyi hoteli, abafatanyabikorwa bayo, abikorera n’abamwe mu bakiliya bayo.
‘Christmas Tree Lighting’ ni ibirori ngarukamwaka bitegurwa na hoteli ya Grand Legacy, mu rwego rwo kwifatanya n’abakiliya b’imena n’abafatanyabikorwa bayo batandukanye bakishimira ibyagezweho muri uwo mwaka, basangira iminsi mikuru iwusoza.
Ni ibirori byaranzwe n’ibihe byo kwidagadura haba mu mbyino no ndirimbo gakondo.
Muri ibi birori kandi hanakinwe umukino wo gutombora zimwe muri serivisi zitangwa n’iyi hoteli, zirimo kuhafatira amafunguro, kuharuhukira ku buntu, ifatabuguzi ry’amezi atatu mu nzu bakoreramo siporo ‘Gym’ ryahawe abanyamahirwe babiri, ndetse n’uwahawe kumara amezi atatu yoga muri ‘piscine’ ku buntu.
Umuyobozi Mukuru wa Grand Legacy Hotel, Ndagijimana Christian, yabwiye IGIHE ko ‘Christmas Tree Lighting’ ari igikorwa cy’ingenzi cyane kuri hoteli, kuko gishimangira imikoranire myiza bagirana n’ababagana, ari na yo mpamvu cyagizwe ngarukamwaka.
Ati “Ni igikorwa duhuriramo n’abafatanyabikorwa bacu, tubashimira kubwo kutuba hafi, kuko ni bo batuma Grand Legacy ikomeza kubaho, kandi ibyo twagezeho mu myaka 11 tumaze dukora, babigizemo uruhare rutaziguye.”
Rwiyemezamirimo Dr. Nsengumuremyi Alex washinze Grand Legacy Hotel, yashimye leta n’abafatanyabikorwa babo ku bwo kubashyigikira, ubwo bari mu bihe bitoroshye bya Covid-19.
Yagize Ati “Turashimira Leta y’u Rwanda kuko kuva mu ntangiriro yagiye idufasha biciye muri RDB, mu gihe cya Covid-19, ubukerarugendo n’amahoteli byagizweho ingaruka zikomeye, ariko leta yakomeje kutuba hafi twagwa ikatwegura, uruhare rwayo rwari ingenzi cyane.”
Grand Legacy Hotel, ifite ibyumba byo kuruhukiramo 43, ikagira ‘piscine’ nziza na ‘gym’ ikorerwamo imyitozo ngororamubiri, ifite kandi ‘restaurant’ ebyiri ngari, ibyumba by’inama bitandatu n’izindi serivisi zitandukanye zirimo umwihariko wo gushyira abantu amafunguro aho baherereye.
Iyi hoteli y’inyenyeri enye yafunguye imiryango muri Gicurasi 2014, ifite abakozi 160 bahoraho n’abandi bahabwa akazi iyo kabaye kenshi.
Mu rwego rwo kwagura imikorere Grand Legacy Hoteli yatangiye imirimo yo kubaka ishami ku kirwa cya Nkombo, iteganyijwe kurangira mu 2028.
Grand Legacy Hotel yifurije abayigana iminsi mikuru myiza
Ibirori bya Grand Legacy Hotel byo kwinjiza abayigana byitabiriwe n’abayobozi mu nzego zinyuranye
Umuyobozi Mukuru wa Grand Legacy Hotel, Ndagijimana Christian, yavuze ko ‘Christmas Tree Lighting’ ari igikorwa gishimangira imikoranire myiza bagirana n’ababagana’
Ni ibirori byabereye kuri ‘piscine’ ya Grand Legacy Hotel